बार्साको जीत, मेस्सीको कीर्तिमानीमा सुधार

फूटबलका जादुगर लियोनल मेस्सी २ गोल र डेभिड भिल्लाले थप १ गोल गरेपछि आइतबार राती सम्पन्न ला लिगा अन्तर्गतको खेलमा रायो भाल्लेकानो विरुद्ध ३-१ को जीत दर्ता गर्दै बार्सिलोना साबिकको विजेता रियल म्याड्रिड भन्दा १३ अंक अगाडि बढ्न सफल भएको छ। बार्साको लागि भिल्लाले २४ औं मिनेटमा गोलको खाता खोलेका थिए भने मेस्सी ३९ औं मिनेटमा मध्यान्तर पछि  ५६ औं मिनेटमा गोल गरेका थिए। गत हप्ता मात्र लिगमा लगातार १७ खेलमा गोल गरेर कीर्तिमानी बनाएका मेस्सी १८ औं खेलमा पनि गोल गर्दै कीर्तिमानीमा सुधार गरेका छन्। २८ खेल पछि बार्सिलोनाको ७४ अंक भएको छ भने रियल म्याड्रिडको ६१ अंक छ। गत बर्ष लिगमा ५० गोल गरेर कीर्तिमानी बनाएका मेस्सीले जारी लिगमा आफ्नो गोल संख्या ४२ पुराएका छन्।
आइतबार राती सम्पन्न अन्य खेलमा इस्पनियोलले च्याम्पियन लिगको अन्तिम ८ मा पुग्न सफल टिम मालागा विरुद्ध २-० को जीत दर्ता गर्यो भने लिग तालिकाको तेस्रो स्थानमा रहेको एथ्लेटिको म्याड्रिडले पनि ओसासुनालाई सामान २-० ले पाखा लगायो। सेभिल्लाले रियल जारागोजा विरुद्ध ४-० को फराकिलो जीत निकाल्दै १० औं स्थानमा उक्लियो भने ग्रानाडा र लेभान्टेले १-१ को बराबरी खेले।