आरसिटी पराजीत, एनआरटी दोस्रो स्थानमा

रेड बुल ए डिभिजन सुपर लिग अन्तर्गत बुधबार सम्पन्न खेलमा न्यूरोड टिम विजयी हुँदै लिग तालिकाको दोस्रो स्थानमा उक्लिएको छ। सुपर लिगमा खेलेको ४ खेल मध्ये ३ मा जीत र १ हारको नतिजा आत्मसाथ गरेको एनआरटी ३५ अंक सहित लिगको दोस्रो स्थानमा उक्लिएको हो। समान खेल खेलेको लिग लिडर थ्री स्टार ३९ अंक सहित लिग तालिकाको शीर्ष स्थानमा रहेको छ भने मनाङ्ग ३४ अंक सहित तेस्रो स्थानमा रहेको छ। एनआरटीले पहिलो खेलमा मच्छिन्द्रलाई पराजीत गरेको थियो भने दोस्रो खेल पुलिसलाई सुम्पिएको थियो। तेस्रो खेलमा लिग लिडर थ्री स्टारलाई स्तब्ध बनाएको आज सम्पन्न खेलमा आरसिटीलाई २-१ ले पछि पारेको हो। आरसिटीलाई पराजीत गर्ने क्रममा सुबास गुरुङ ए ले २१ औं मिनेटमा पहिलो गोल गरेका थिए भने दोस्रो गोल मध्यान्तर पछि खेल सुरु भएको १७ सेकेन्डमा नै अकीमले गरेका थिए। आरसिटीको तर्फबाट भिम दर्लामीले ८६ औं मिनेटमा गोल गरेपनि सो गोल पराजय टार्न काफी भएन। सुपर लिगको ४ खेलमा आरसिटीले भने ३ मा पराजय र १ मा जीत नतिजा निकालेको छ। आरसिटीको २९ अंक मात्र रहेको छ।