पूर्व राजाको अगाडि शेर्पाको जीत, फाइनलमा मनाङ्गसंग भिड्ने

हिमालयन शेर्पा क्लब चौथो म्याजिक मोमेन्ट सिमरा गोल्ड कपको फाइनल प्रवेश गरेको छ। आज सम्पन्न संकटा विरुद्धको खेल 2-1 ले आफ्नो पक्षमा परेपछि उपाधि भिडन्तको लागि आफ्नो भेट मनाङ्गसंग पक्का गरेको हो। पहिलो हाफ गोलरहित बराबरी खेलेको प्रतिस्प्रर्धामा दोस्रो हाफको 56 औं मिनेटमा धिरज तामांगले शेर्पाको तर्फबाट गोल गरेका थिए। 81 औं मिनेटमा उडबहादुर गुरुंगले संकटाको तर्फबाट बराबरी गोल गरेपछि निर्धारित समय 1-1 को बराबरीमा सकिएको थियो। अतिरिक्त समयको पहिलो हाफमा पनि दुवै पक्षबाट कुनै गोल हुन सकेन। अतिरिक्त समयको दोस्रो हाफको 5 औं मिनेटमा जंबु शेर्पाले उपलब्ध गराएको क्रस बललाई गणेश खड्काले जाली चुमाए, त्यहि गोल नै निर्णायक भयो। खेलको अन्तिम समय शेर्पा 10 खेलाडीमा सिमित भएको थियो। शेर्पाका सचिन्द्र धिमाल दोहोरो पहेलो कार्ड खादै मैदान बाहिरिएपछि शेर्पा 10 जनामा सीमित भएको थियो। उदयपुर गोल्डको फाइनलमा थ्री स्टार संग पराजीत शेर्पा अब मनाङ्गसंग सिमरा गोल्ड कप चुम्नको लागि खेल्ने छ।
आजको खेल हेर्न पूर्व राजा ज्ञानेन्द्र शाह पनि खेल मैदान आएका थिए।