फिडे ग्रान्ड स्विस २०२५: अनिश गिरीको प्रभावशाली जित

फिडे ग्रान्ड स्विस २०२५ को नवौं चरणमा दुई निर्णायक खेलहरूले प्रतियोगिताको शीर्ष स्थानमा नयाँ मोड ल्याएका छन्। जर्मनीका GM भिन्सेन्ट कीमर र नेपाली मुलका नेदरल्यान्डका GM अनिश गिरीले आ–आफ्ना प्रतिस्पर्धीहरूलाई पराजित गर्दै ६.५/९ अंकसहित शीर्ष दुर्इको लागि बलियो प्रतिस्पर्धी बनेर अगाडि निस्किएका छन् ।

कीमरको सशक्त पुनरागमन

१९ वर्षीय जर्मन ग्रान्डमास्टर भिन्सेन्ट कीमरले ईरानी स्टार GM पार्हाम मघसूदलूलाई पराजित गर्दै प्रतियोगितामा आफ्नो दावेदारी बलियो बनाएका छन्। कीमरले खेलभरि सन्तुलित रणनीति अपनाउँदै मघसूदलूलाई गल्ती गर्न बाध्य बनाए। मघसूदलू यसअघि उत्कृष्ट लयमा थिए, तर कीमरको दबाबले उनको गति रोकिदियो। कीमरलाई युरोपको भविष्यको विश्व च्याम्पियनको सम्भावित दावेदार मानिन्छ। उनले सन् २०१९ मा ग्रान्डमास्टर उपाधि प्राप्त गरेका थिए र त्यसयता लगातार प्रगति गरिरहेका छन्।

गिरीको अनुभवको विजय

नेपाली मुलका नेदरल्यान्डका अनुभवी ग्रान्डमास्टर अनिश गिरीले नेदरल्यान्डकै अर्का शीर्ष खेलाडी GM जोर्डन भान फोरेस्टलाई पराजित गर्दै ६.५ अंकमा पुगे। गिरीले खेलको मध्यभागमा आक्रामक चालहरू खेल्दै फोरेस्टलाई दबाबमा राखे। अन्ततः उनले निर्णायक लाभ उठाउँदै खेल आफ्नो पक्षमा मोडे।

गिरी विश्वको शीर्ष १० खेलाडीमध्ये एक हुन्, र उनी आफ्नो गहिरो रणनीतिक सोचका लागि प्रसिद्ध छन्। उनले विश्व च्याम्पियनशिपको उम्मेदवारीका लागि पटक–पटक प्रतिस्पर्धा गरिसकेका छन्।

प्रतियोगिता अन्तिम मोडमा प्रवेश गर्दैछ। कीमर र गिरी दुवै शीर्ष स्थानका लागि बलियो दावेदार बनेका छन्। यदि उनीहरूले अन्तिम दुई चरणमा निरन्तरता कायम राखे भने, क्यान्डिडेट्स टूर्नामेन्ट २०२६ को टिकट सुरक्षित गर्न सक्नेछन्।