सुदिप तामाङको श्रीलंकामा उत्कृष्ट प्रदर्शन जारी

नेपालका प्रतिभाशाली चेस खेलाडी सुदिप तामाङले आज सम्पन्न भएको ९औं नेगम्बो अन्तर्राष्ट्रिय रेटिङ चेस फेस्टिवलको सातौं र आठौं चरणमा सन्तुलित प्रदर्शन गर्दै शीर्ष स्थानको दौडमा आफूलाई कायम राख्न सफल भएका छन्।

सातौं चरणमा, सुदिपले भारतका इन्टरनेशनल मास्टर आर्यन वर्षने (रेटिङ २४८९) सँग प्रतिस्पर्धा गरे। उच्च रेटिङ भएका प्रतिद्वन्दीसँगको खेलमा सुदिपले साहसिक प्रयास गरे तापनि पराजित भए। यो हार प्रतियोगिताको उनको पहिलो हार हो, तर उच्च स्तरको खेलाडीविरुद्धको खेल अनुभव भविष्यका लागि महत्वपूर्ण हुनेछ।

आठौं चरणमा, सुधिपले श्रीलंकाका धनोड्या बुद्धमिना हेत्तिगोडा (रेटिङ १७५६) सँग प्रतिस्पर्धा गर्दै बराबरीको नतिजा निकाले। यो बराबरीले उनको कुल अंकलाई ६ मा पुर्‍याएको छ, जसले उनलाई शीर्ष १० नजिकै राखेको छ।

अब अन्तिम चरण भोलि खेलिनेछ, जसले सुदिपको स्थान निर्धारण गर्नेछ। अहिलेसम्मको निरन्तर प्रदर्शन र रणनीतिक कौशलले अन्तर्राष्ट्रिय स्तरमा पहिचान दिलाएको छ, र नेपाली चेसको भविष्य उज्ज्वल देखिएको छ।

अन्तिम चरणमा सुदिपले श्रीलंकाका किथमिना डब्लु के भिहान्गासित खेल्नेछन् ।