म्यान युनाइटेडलाई इन्टरनेशनल च्याम्पियन्स कप

इङलिस क्लव म्यानचेष्टर युनाइटेडले प्रि–सिजन प्रतियोगिता इन्टरनेशनल च्याम्पियन्स कपको उपाधि उचालेको छ। अमेरिकाको मियामीमा आज बिहान भएको फाइनलमा अर्को इङलिस क्लव लिभरपुललाई १ का बिरुद्ध ३ गोलले हराउँदै म्यान युनाइटेडले उपाधिमाथि कब्जा जमाएको हो।
खेलमा अग्रता भने लिभरपुलले क्याप्टेन स्टेफन जेरार्डको पेनाल्टीबाट पहिलो हाफको १४ औं मिनेटमा लिएको थियो। दोस्रो हाफमा उत्कृष्ट प्रदर्शन गरेको लुइस भान हालको टोलीले ५५ औं मिनेटमा वायन रुनीको गोलबाट खेलमा पुनरागमन जनायो। त्यसको २ मिनेट नबित्दै हुँवा माटाले गोल थपे र म्यान युनाइटेड २–१ ले अघि बढ्यो। खेलको अन्त्यतिर सब्सिट्युटका रुपमा मैदान छिरेका जेसी लिङगर्डले गोल थपे र युनाइटेड ३–१ ले विजयी भयो।
अघिल्लो सिजन इङलिस प्रेमियरसिपमा खराब प्रदर्शन गरेको म्यान युनाइटेडले यसपाली नयाँ प्रशिक्षकको आगमनसँगै प्रदर्शनमा सुधार ल्याएको छ। अमेरिका भ्रमणमा टोलीले स्प्यानीश जायन्ट रियाल मड्रिडलाई ३–१ ले, इन्टर मिलानलाई पेनाल्टी शुटआउटमा ५–३ ले र रोमालाई ३–२ ले पराजित गरेको थियो।
यो सिजनको प्रेमियरसिप यात्रा रेड डेभिल्सले यही साउन ३१ गते स्वान्सी सिटीसँग खेलेर थाल्नेछ।