रोनाल्डो नयाँ सिजनका लागि पूर्ण फिट

विश्वकपको खराब प्रदर्शनलाई बिर्सदै पोर्चुगलका सुपरस्टार क्रिस्टियानो रोनाल्डाले नयाँ सिजनका लागि आफू पूर्ण रुपमा फिट भएको बताएका छन्।

'अघिल्ला बर्षहरुमा जस्तै सिजनभर राम्रोको लागि गर्नेछु। उत्कृष्ट खेल्छु । टोलीलाई सहयोग गर्छु । गोल गर्न र उपाधि जित्न प्रयास गर्छु,' प्रायोजकको कार्यक्रममा भाग लिन जापान रहेका २९ बर्षे स्ट्राइकरले भने । उनले आफु अझै ६-७ बर्ष उच्च स्तरको प्रतिस्पर्धाका लागि उपलब्ध रहने बताए।

गत महिना ब्राजिलमा सम्पन्न विश्वकप फुटबलमा पोर्चुगल नकआउट चरण पुग्न असफल भएको थियो। समूह चरणका ३ मध्ये पोर्चुगलले १ मा जित, १ मा बराबरी र अर्को खेलमा हार बेहोरेको थियो। घुँडाको चोटका कारण रोनाल्डो विश्वकपमा अपेक्षा अनुसारको प्रदर्शन गर्नबाट चुकेका थिए । ३ खेलमा उनले थ्रुपै मौका गुमाए भने १ गोलमात्र गरे । विश्वकप सुरु हुनु केही अघि मात्र उनलाई चोट लागेको थियो ।

'नयाँ सिजनमा केन्द्रित हुन्छु । चोट पूर्णरुपमा ठिक भैसक्यो । अहिले खुसी छु,' उनले भने । स्पेनिस लिगको सुरुआत र अन्त्य उच्चस्तरबाट गर्ने र त्यसका लागि आफु पुरा तयार रहेको उनले जनाए ।

विश्वकपका बारेमा उल्लेख नगरि रोनाल्डोले गत सिजन अविश्वसनिय रहेको बताए । थ्रपै व्यक्तिगत पुरस्कारसहित उनको क्लब रियाल मड्रिडले १० औं पटक च्याम्पियन्स लिग र स्पेनको पुरानो फुटबल प्रतियोगिता कोपा डेल रे उपाधि जितेको थियो ।

गत सिजन स्पेनिस ला लिगा र च्याम्पियन्स लिगका उच्च गोलकर्ता रहेका रोनाल्डोले दोस्रो पटक बालोन डे ओर पनि जितेका थिए ।

फिटनेसका सामाग्रीको प्रवद्धन गर्न जापान पुगेका रोनाल्डोले भने,' हामीले अघिल्लो सिजनकै प्रदर्शनलाई निरन्तरता दिनुपर्छ । त्यसो गर्न सकेन यो बर्ष ५÷६ उपाधि जित्न सक्छौं । त्यसैमा मेरो ध्यान छ । मेरो लागि सबै सिजन चुनौतिपूर्ण हुन्छ र त्यसको सामना गर्न तयार छु ।'

उनले आफू सतप्रतिशतक खेलमा समर्पित रहेको र खेल जीवनको अन्तिमसम्म त्यस्तै प्रयासमा लाग्ने समेत वाचा गरे ।