​प्रि–सिजनमा म्यान युनाइटेडलाई सफलता

इङलिस क्लव म्यानचेष्टर युनाइटेडले प्रेमियरसिप अघिको प्रि–सिजन टुरमा शतप्रतिशत नतिजा निकालेको छ । अमेरिका टुर अन्तर्गतको तेस्रो तथा अन्तिम खेलमा म्यान युनाइटेडले इटालियन क्लव इन्टर मिलानलाई पेनाल्टी शुटआउटमा ३ का बिरुद्ध ५ गोलले पराजित गर्‍यो । योसँगे क्लव अन्तर्राष्ट्रिय च्याम्पियन्स कपको फाइनलमा प्रवेश गरेको छ । वासिङटन डी.सी.मा भएको खेलको निर्धारित समय गोलरहित बराबरीमा सकिएपछि निर्णय पेनाल्टी शुटआउटबाट लिइएको थियो ।
रेड डेभिल्सका एस्ले योङ्ग, जाभिएर हर्नाण्डेज, टम क्लेभर्ली, सिन्जी कागावा र ड्यारेन फ्लेचरले पेनाल्टीमा गोल गरे । म्यान युनाइटेडबाट हालैबाट इन्टर स्थानान्तरण भएका निमान्जा भिडिचले हिजोको खेलमा कुनै जादु देखान सकेनन् ।
यसअघि म्यान युनाइटेडले लस एन्जल्स ग्यालेक्सी र रोमालाई अमेरिकामा हराएको थियो । प्रशिक्षक लुइस भान हालले क्लवले उत्कृष्ट खेल खेलेको र खेलाडीहरु समेत लयमा फर्किएको प्रतिक्रिया दिएका छन् ।
गएराति नै भएका अन्य खेलमा रोमाले स्पेनिस जायन्ट रियाल मड्रिडलाई १–० ले हरायो । पहिलो हाफ गोलरहित सकिए पनि दोस्रो हाफको ५८ औं मिनेटमा फ्रान्सेस्को टोट्टीले गोल गर्दै इटालियन क्लवलाई जित दिलाए ।