नेपाली समर्थकसँग म्यानचेष्टर युनाइटेड खुशी

इंग्लिस क्लव म्यानचेष्टर युनाइटेडले आफ्नो फेशबुक पेजमा नेपाली समर्थकलाई स्थान दिएको छ । अमेरिकाको डेनभारमा शनिबार राती भएको एएस रोमाविरुद्धको खेल हेर्न पुगेका म्यानचेष्टर युनाइटेडका नेपाली समर्थकको तस्बिर क्लवले आफ्नो फेसबुक पेजमा राखेको हो ।

‘डेनभारमा हाम्रा नेपाली समर्थकको उपस्थिती देख्दा हामी गौरवान्वित भएका छौं ’ म्यानयुले तस्बिरसँगै लेखेको छ ‘तपाईंको समर्थका लागि धन्यवाद, नेपाल ।’

विश्वकप फुटबलमा नेदल्याण्ड्सलाई सेमिफाइनलसम्म पुर्‍याएका प्रशिक्षक लुइस भान गालले विश्वकप लगत्तै म्यानयूको प्रशिक्षणको जिम्मेवारी लिएका छन् । इंग्लिस प्रिमयिर लिग सुरु हुनुअघि म्यानयू अहिले अभ्यास तथा प्रशिक्षणका क्रममा अमेरिकामा छ । त्यही क्रममा एएस रोमासँग खेलेको खेलमा म्यानयू ३–२ ले विजयी भएको छ । यो खेल हेर्न झण्डै ५५ हजार दर्शक उपस्थित थिए । जसमा अमेरिकामा रहेका नेपालीहरु पनि थिए । ती मध्येका केही नेपाली समर्थकले नेपालको झण्डा अंकित र एमयुएफसी नेपाल लेखिएको जर्सी लगाएका थिए ।