थ्री स्टार उपाधि नजिक, पुलिसको लगातार दोस्रो जीत

रेड बुल ए डिभिजन सुपर लिगमा पुलिस विरुद्धको खेल गुमाएको शीर्ष टोली थ्री स्टार क्लब मंगलबार सम्पन्न दोस्रो खेलमा भने फ्रेन्ड्स विरुद्ध १-० कठिन जीत निकाल्दै उपाधि नजिक पुगेको छ। जीत पछि थ्री स्टारको ३८ अंक भएको छ भने अन्य पच्छ्याउने टोलीको २९ अंक भन्दा बढी छैन। थ्री स्टारको जीतमा कप्तान सन्तोष सहुखलाले दोस्रो हाफको ५२ औं मिनेटमा गोल गरेका थिए। मंगलबार नै सम्पन्न खेलमा नेपाल पुलिस क्लबले एक गोलले पछि परेको स्थिति उल्टाउदै एनआरटि विरुद्ध २-१ को जीत दर्ता गर्न सफल भयो। सुपर लिगमा पुलिसको यो लगातार दोस्रो जीत हो। जीत संगै पुलिस २९ अंक सहित लिग तालिकाको तेस्रो स्थानमा उक्लिएको छ। अकिनले खेल सुरु भएको ५ मिनेट भित्रै एनआरटीअग्रता दिलाए पछि १-० ले पछि परेको पुलिसलाई जीत दिलाउन भोला सिलवालले ४९ औं मिनेटमा र पर्वत पाण्डेले ७३ औं मिनेटमा गोल गरेका थिए।