चेल्सी पराजीत, इन्टर विरुद्ध स्पर्सको शानदार जीत

वेल्सम्यान गेरिथ बयलले  आफ्नो खेललाई निरन्तरता दिदै सिजनको २१ औं गोल गरेपछि युरोप लिग अन्तर्गत  अन्तिम १६ को पहिलो लिगमा इन्टरलाई ३-० ले पराजीत गर्न टोटनहम सफल भयो। टोटनहमको लागि गेरिथ बयलले  सुरुवाती छैटौ मिनेटमा नै हेडमार्फत सुन्दर गोल गर्दै अग्रता दिलाएका थिए। १८ औं मिनेटमा स्पर्सको लागि ग्यल्फी सिगुर्दसनले अर्को गोल थपेपछि इन्टर मध्यान्तर अघि २-० ले पछि परेको थियो। दोस्रो हाफको ५३ औं मिनेटमा स्पर्सका जान भेरटोंघेन तेस्रो गोल गरे, त्यसपछि कुनै गोल हुन सकेन।
विहीबार नै सम्पन्न अर्को खेलमा चेल्सी पराजीत भयो। पहिलो हाफको ३४ औं मिनेटमा प्राप्त पेनाल्टीमा स्टेऔअ बुचारेस्टका राउल अद्रेइ रुसेस्कुले गोल गरेपछि चेल्सी १-० ले पछि परेको थियो। बराबरी गोल फर्काउनको लागि चेल्सीले धेरै प्रयास गरे पनि बेनीटेजको टोली हार टार्न सकेन।
बिहीबार राती नै सम्पन्न अन्य खेलमा फेनेरबह्सेले एफसी भिक्टोरिया प्लज़ेनलाई र बेन्फिकाले बोर्ड़ेऔक्षलाई समान १-० ले पराजीत गर्यो भने लजिओले भिएफबी स्टुटगार्टलाई २-० ले पछि पार्यो। अन्जी माखाचकल र न्युकासल युनाइटेड, लाभान्टे र रुबिनले एक-आपसमा गोलरहित बराबरी खेले।