पुलिसको जीत, उपाधिको होड खुल्ला

लिग लिडर थ्री स्टार ए डिभिजन सुपर लिगको पहिलो खेलमा डिफेन्डीङ्ग च्याम्पियन नेपाल पुलिससंग २-१ पराजीत भएको छ। दोस्रो स्थानमा रहेको नेपाल आर्मी क्लब आज फ्रेन्ड्स विरुद्ध सफल भए थ्री स्टार र आर्मी बीचको फरक ४ अंकमा झर्ने छ। थ्री स्टार ३५ अंकसहित शीर्ष स्थानमा छ भने १ खेल कम खेलेको आर्मी २८ अंक सहित दोस्रो स्थानमा छ। पुलिसको  भने २६ अंक भएको छ।
राष्ट्रिय टिमबाट नेपालको लागि १० गोल गरिसकेका तर पछिल्लो समय राष्ट्रिय टिममा मौका खेल्ने मौका कमै मात्र पाएका जुमानु राईले सुन्दर खेल खेलेपछि पुलिसको जीत सम्भव भएको थियो। राईले पहिलो गोलको लागि अवसर सिर्जना गरिदिएका थिए। जुमानुकै क्रसमा २२ औं मिनेटमा रमेश कटुवालले पहिलो गोल गरेका थिए। थ्री स्टारका सन्दीप राई र किरण चेम्जोङ्ग बीच आपसी तालमेल नमिलेको अवस्थामा ७० औं मिनेटमा जुमानुले उत्कृस्ट गोल गरेपछि पुलिस २ गोलले अगाडि बढेको थियो। थ्री स्टारका भिक्टरले ७४ मिनेटमा गोल गर्दै खेलमा फर्कने संकेत गरेपनि त्यसपछि कुनै गोल हुन सकेन। खेलको अन्तिम समय पुलिसका सुमन सुबेदी रातो कार्ड खाँदै बाहिरिए पछि पुलिस १० खेलाडीमा सिमित भएको थियो। यो जीत संगै उपाधिको होड केहि खुल्ला भएको छ भने पुलिसले पहिलो चरणमा २-० को हारको बदला लिएको छ।