मच्छिन्द्र मनाङ्गसंग भारी गोलअन्तरले पराजीत

रेड बुल ए डिभिजन सुपर लिग अन्तर्गत पाँचौ चरणको पहिलो खेल अन्तर्गत शनिबार सम्पन्न खेलमा मनाङ्ग मर्स्याङ्गदी क्लब मच्छिन्द्र विरुद्ध ३-० प्रभावशाली जीत निकाल्न सफल भएको छ। जीत संगै मनाङ्गको २० खेलबाट ३७ अंक भएको छ। मच्छिन्द्र भने समान खेल खेल्दै ३२ अंकमा सिमित भयो। मनाङ्गको जीतमा सर्जियो सिकोले २ तथा अनिल गुरुङले १ गोल गरेका थिए। अनिलले पहिलो हाफको २८ औं मिनेटमा गोलको खाता खोलेका थिए भने अन्य २ गोल सिकोले दोस्रो हाफ सुरु भएको ३ मिनेटमा र निर्धारित समय सकिन ३ मिनेट अगाडि गरेका थिए। यो जीत संगै मनाङ्गले लिग पहिलो चरणमा मच्छिन्द्र संग हारको बदला लिन सफल भयो। सुपर लिगमा यो नै अहिले सम्मको सबैभन्दा फराकिलो अन्तरको हार-जीत हो। मनाङ्गको जीतले लिग लिडर थ्री स्टारलाई केही दबाब बढेको छ। थ्री स्टार दिनको दोस्रो खेलमा आरसिटी संग खेल्दै छ। सुपर लिगमा राम्रो लयमा नदेखिएको थ्री स्टारले ४ खेलबाट ४ अंक मात्र जोड्दै ३९ अंकका साथ लिग तालिकाको शीर्ष स्थानमा छ।