लिभरपूल पराजीत, बले चम्किदा टोटनहमको जीत

युरोपा लिग अन्तर्गत बिहीबार राती सम्पन्न अन्तिम 32 को पहिलो लिगमा लिभरपूल पराजीत भएको छ। रसियन चाम्पियन जेनिटले दोस्रो हाफमा 3 मिनेटको अन्तरमा दुई गोल गरेपछि लिभरपूल 2-0 ले हार बेहोर्न बाध्य भएको हो। जेनिटको लागि 69 औं मिनेटमा हल्क र 72 औं मिनेटमा सेर्जेय सेमकले गोल गरेका थिए।
बिहीबार नै सम्पन्न अर्को खेलमा आन्द्रेस भिलास बोएसको टिम टोटनहम हट्सस्पर्सले फ्रान्सेली क्लब ल्योन  लाई 2-1 ले पछि पर्न सफल भयो। टोटनहमको लागि गरेथ बलेले सुन्दर खेल खेले। पहिलो हाफको अतिरिक्त समयमा गरेथ बलेको गोलबाट अगाडि बढेको टोटनहमलाई दोस्रो हाफको 55 औं मिनेटमा सामुएल उम्टीटीले ल्योनको तर्फबाट बराबरी गोल फर्काएपछि खेल बराबरी तर्फ़ धकेलिएको थियो। तर दोस्रो हाफको अतिरिक्त समयको तेस्रो मिनेटमा प्राप्त फ्री-किकलाई गरेथ बलेले सुन्दर गोलमा परिणत गरेपछि टोटनहमले जीत आत्मसाथ गरेको थियो।
बिहीबार नै सम्पन्न अर्को खेलमा चेल्सीले स्पर्टालाई 1-0 ले पछि पर्न सफल भयो। चेल्सीको लागि ओस्कारले 82 औं मिनेटमा गोल गरेका थिए।  अन्य खेलमा इन्टर मिलनले क्लुजलाई 2-0 ले पराजीत गर्यो भने न्युक्यासल युनाईटेड र मेतालिस्ट खार्कीले गोलरहित बराबरी खेले। लाजियोले पनि मोंचेंगलाडबेचसंग 3-3 को बराबरी खेल्यो।